Временските услови во некои од најгусто населените градови на светот се менуваат од суши до поплави и обратно, како што порастот на температурите ја нарушува глобалната водна циркулација, покажала студијата која ја нарача хуманитарната организација WaterAid и e објавена во средата.
Јужна и Југоисточна Азија се соочуваат со најсилни трендови на зголемена влажност, додека Европа, Блискиот Исток и Северна Африка стануваат сè по-суви, покажале истражувачите во студија работена 42 години.
„Ќе има победници и губитници поврзани со климатските промени,“ изјави Мајкл Сингер од Институтот за водени истражувања на Универзитетот во Кардиф, еден од авторите на студијата. „Ова веќе се случува.“
Источниот кинески град Хангџоу и индонезискиот главен град Џакарта се на врвот на листата на градови кои страдаат од „климатски потреси“, или брза последователност на продолжени поплави и суши, покажала студијата.
Дури 15% од градовите што беа истражувани се соочуваат со најлошото од двата света, со зголемени ризици од екстремни поплави и суши истовремено, меѓу нив се и Далас, кинескиот трговски центар Шангај и Багдад, главниот град на Ирак.
Кинескиот приморски град Хангџоу постави рекорд со повеќе од 60 дена екстремно високи температури минатата година, а исто така беше погоден од тешки поплави кои принудија десетици илјади луѓе да се евакуираат.
Многу градови кои изградиле инфраструктура со цел да го максимизираат ограниченото снабдување со вода или да го ублажат поплавниот ризик, сега се соочуваат со сосема различни околности и ќе мора да инвестираат за да се адаптираат, предупреди Сингер.
Неколку градови кои доживеале поволни промени вклучуваат јапонскиот главен град Токио, Лондон и кинескиот јужен Гуангжу, кои имале значително помалку влажни и суви месеци во периодот од 2002 до 2023 во споредба со претходните две децении.
