Градоначалникот на Њујорк, Зохран Мамдани, потврди дека лично го повикал претседателот Доналд Трамп за да го изрази своето остро противење на апсењето на венецуелскиот претседател Николас Мадуро и неговата сопруга.
„Го повикав претседателот и разговарав директно со него за да го евидентирам моето противење на овој чин и јасно да ставам до знаење дека тоа противење се темели на спротивставување на обидите за промена на режимот, како и на кршењето на федералното и меѓународното право“, изјави Мамдани пред новинарите на прес-конференција во Бруклин.
Од Белата куќа сè уште нема коментар за телефонскиот разговор, објави CNN.
Мамдани, кој е само третиот ден на новата функција, претходно американската операција за апсење на Мадуро и неговата сопруга ја нарече воен чин. Тој нагласи дека, според неговото мислење, биле прекршени и федерални и меѓународни закони.
„Го изразив своето противење. Тоа јасно го кажав и тука застанавме“, додаде градоначалникот, без да открие каков бил одговорот на Трамп.
Мадуро наскоро во Њујорк
Се очекува Мадуро да биде задржан во федерален притвор во Њујорк, каде што се соочува со федерални обвиненија. Мамдани изјави дека за апсењето бил информиран од неговиот прв заменик и од комесарката на њујоршката полиција, Џесика Тиш.
Иако не изнесе повеќе детали за пристигнувањето на Мадуро, тој нагласи дека градските служби работат на тоа да се обезбедат минимални пречки за граѓаните на Њујорк.
