Денес граѓаните на Нови Сад одбележуваат 10 месеци од падот на надстрешницата на влезот на Железничката станица, во кој трагично загинаа 16 лица, а едно лице беше тешко повредено.
Граѓанската иницијатива „Зборови на Нови Сад“ ги повика сите да се соберат во 11:52 часот – точното време на несреќата – и да оддадат 16 минути тишина во чест на загинатите. Покрај овој собир, средношколци организираат настан од 19 часот во кампусот на Универзитетот во Нови Сад под мотото: „Средношколци паметат – сите сме под надстрешница“. Настанот е поддржан од студентите кои ги држат во блокада факултетите во Нови Сад.
„Средношколците паметат, ние се приклучуваме“, соопштија студентите.
Трагедијата што се случи на 1 ноември 2024 година покрена масовни протести ширум Србија. Граѓани, студенти и активисти бараа одговорност и транспарентна истрага. Но, и по 10 месеци, судски процес сѐ уште не е започнат, а обвинителската постапка е блокирана.
Причината е барањето на еден од осомничените – поранешниот министер за градежништво, сообраќај и инфраструктура, Горан Весиќ, за изземање на сите постапувачки обвинители во Нови Сад, како и на врховната јавна обвинителка Загорка Доловац.
Дополнително, на 1 август Обвинителството за организиран криминал соопшти дека се уапсени шест лица во рамки на финансиската истрага поврзана со проектот „Модернизација и реконструкција на унгарско-српската железничка пруга на релација Нови Сад – Суботица – државна граница (Келебија)“. Меѓу уапсените се: Томислав Момировиќ, поранешен министер за градежништво (2020–2022) и Анита Димоски, поранешна в.д. помошничка министер и раководителка на Секторот за железници
Граѓаните, учениците и студентите најавуваат дека нема да престанат да бараат правда и одговорност за загубените животи и предупредуваат дека тишината нема да ги избрише последиците од институционалниот колапс.
