Гугл во понеделникот го претстави новиот квантен компјутерски чип за кој тврди дека е големо ново откритие што би можело да го доближи практичното квантно пресметување до реалноста.
Новите генерации чипови, конкретно прилагодениот чип наречен „Willow“ ќе можат да решат компјутерски проблем за неколку минути, за што на сегашните најбрзи суперкомпјутери би им биле потребни десет септилиони години, изјави основачот на Google Quantum AI Lab, Хартмут Невен, чиј тим се состои од 300 експерти.
Како и другите технолошки гиганти, Google работи на квантно пресметување, ветувајќи брзина на пресметување многу поголеми од денешните најбрзи системи. Иако математичкиот проблем што го реши квантната лабораторија на компанијата во Санта Барбара, Калифорнија, нема комерцијална примена, Google се надева дека квантните компјутери еден ден ќе решат многу проблеми.
– Сметаме дека Willow е важен чекор на нашиот пат кон создавање корисен квантен компјутер со практични апликации во досега нерешливи прашања и области како што се фармакологија и медицина, дизајн на батерии, енергија на фузија и вештачка интелигенција, запирање на климатските промени…, рече извршниот директор на Google, Сундар Пичаи.
Квантен компјутер кој ќе може да се справи со сите овие предизвици се уште е далеку од реализација, но Willow, главно експериментален уред, означува важен чекор во таа насока, изјавија Невен и неговите членови на тимот.
Тие рекоа дека Google верува во овој проект, но дека „чип способен за комерцијални апликации нема да се појави пред крајот на деценијата“.
Willow има 105 „кубити“, градежните блокови на квантните компјутери. Кубитите се брзи, но склони кон грешки, бидејќи може да бидат нарушени.
Што повеќе кубити се спакувани на чип, грешките може да се собираат, што го прави чипот не подобар од конвенционалниот компјутерски чип. Но, од 1990-тите, научниците работат на корекција на квантната грешка.
Пробивот во корекција на грешки, објавен во водечкото научно списание Nature, покажа дека додавањето на повеќе кубити на системот всушност ги намалува грешките наместо да ги зголемува, што е основен услов за градење практични квантни компјутери.
Така Google успеа да најде начин да ги поврзе кубитите на чипот Willow, така што стапките на грешки се намалуваат како што се зголемува бројот на кубити. Од суштинско значење е тоа што чипот на Google ја демонстрираше способноста експоненцијално да ги намалува компјутерските грешки, подвиг што им избегнуваше на истражувачите речиси 30 години.
Системот е замислен така што со помош на модели со вештачка интелигенција, ефективно ќе ги коригира грешките во процесот на квантните компјутери, што е еден од клучните чекори за квантната технологија да стане практично корисна, а компанијата извести дека е во состојба да ги поправи грешките во реално време, затоа, постигнатиот е оној клучен чекор што ќе им овозможи на нејзините квантни машини да станат практични.
Квантното истражување се смета за критична област, така што САД и Кина инвестираат многу во тоа, а Вашингтон постави ограничувања за извозот на чувствителна технологија.
Оливие Езрати, независен експерт за квантни технологии, изјави за АФП во октомври дека приватните и јавните инвестиции во оваа област во светот во последните пет години изнесуваат околу 20 милијарди долари.
Обичните компјутери работат на бинарен начин: тие извршуваат задачи користејќи ситни фрагменти од податоци познати како битови кои секогаш се изразуваат само како 1 или 0. Но, фрагментите од податоци на квантен компјутер, познати како кубити, можат да бидат и 1 и 0 во исто време, овозможувајќи им истовремено да обработат огромен број потенцијални решенија.
