Две лица загинаа откако голем пожар избувна денес во петрохемиска фабрика во рускиот регион Татарстан поради неутврдена вина, соопшти сопственикот на фабриката.
„Според ажурирани информации, две лица загинаа во инцидентот. Осум лица се хоспитализирани. Останатите 64 кои побарале медицинска помош претрпеле полесни повреди“, се вели во соопштението на „Сибур“, најголемата руска петрохемиска компанија и сопственик на фабриката.
Повеќе од 150 пожарникари со 54 возила учествуваа во гаснењето на пожарот во пространиот комплекс кој произведува синтетичка гума и пластика. Пожарот е ставен под контрола. На терен работат 19 екипи за итни случаи, а од Казањ е испратен и хеликоптер на службата за итна медицинска помош.
„Медицинските служби се на местото на настанот, а на жртвите им се пружа потребната помош“, рече Сибур, додавајќи дека експертите го следат квалитетот на воздухот во областа и не идентификувале никакви закани за животната средина или локалното население.
Рускиот регулатор за воздухопловство претходно денес накратко воведе ограничувања на локалниот аеродром Нижнекамск, кој се наоѓа околу 1.000 километри источно од Москва.
Истражниот комитет на Русија отвори случај за прекршување на правилата за индустриска безбедност. Истражителите ги утврдуваат околностите на инцидентот.
