Временските промени за многумина носат непријатен придружник – главоболка што се појавува без очигледна причина, често со мачнина, замор и чувство на тежина во главата. Лекарите објаснуваат дека тоа не е случајност: наглите промени во температурата, влажноста и атмосферскиот притисок влијаат врз ширењето и собирањето на крвните садови, а организмот не секогаш успева навреме да се приспособи.
Овој вид „метеочувствителност“ најчесто ги погодува луѓето кои долго време се изложени на стрес, бидејќи нивните крвни садови веќе се во постојан грч поради хормоните на стрес. Но добрата вест е дека постојат неколку едноставни и ефикасни начини да ја намалиме болката.
Наизменично туширање – природен стимуланс за крвните садови
Туширањето со топла и студена вода ја подобрува циркулацијата и го стимулира природното ширење и собирање на крвните садови – механизам кој токму при променливо време најчесто „заглавува“. Доволни се 3–4 минути наизменична промена на температурата за да се почувствува олеснување.
Интензивна физичка активност – најбрзиот начин да се активира циркулацијата
Трчање, брзо одење, велосипедизам или пливање ја зголемуваат работата на срцето и го забрзуваат протокот на крв. Ова го намалува притисокот во главата и ги опушта крвните садови. Истражувањата покажуваат дека физичката активност е една од најделотворните природни превенции од мигрена.
Масажа на вратот и горниот дел од грбот
Долгото седење пред компјутер создава напнатост во вратот и рамената, што го ограничува протокот на крв кон мозокот и може да ја засили главоболката. Кратка масажа или вежби за истегнување неколку пати дневно го намалуваат притисокот и ја подобруваат циркулацијата.
Излезете на свеж воздух – мозокот „дише“ подобро надвор
Кратка прошетка или престој во природа, особено после работа, ја намалува напнатоста, му овозможува на мозокот подобра оксигенација и го смирува нервниот систем. Дури и 10 минути надвор можат да направат разлика.
Исхрана богата со магнезиум и витамини од Б-групата
За луѓето кои страдаат од мигрени, стабилните нутритивни нивоа се клучни. Магнезиумот ја намалува преосетливоста на нервниот систем, а витамините Б2 и Б6 помагаат во регулирање на нервната активност. Добри извори се: грав, брокула, спанаќ, лосос, јајца, млеко, семки и јаткасти плодови
Одмор и квалитетен сон – најпотценетата терапија
Недостатокот на сон ги прави крвните садови поосетливи, а нервниот систем „побрзливо реагира“ на промени во времето. Редовното време за спиење, исклучување од работа по работното време и одмор со блиските ја намалуваат веројатноста од појава на главоболка.
Главоболките поради промена на времето се последица од физиолошки реакции што сите ги имаме, но не сите ги чувствуваме подеднакво. Со неколку едноставни навики – движење, масажа, свеж воздух, корисна исхрана и добар сон – можеме значително да го намалиме влијанието на променливото време врз нашето здравје.
Телото секогаш ни сигнализира – а наша задача е да го слушаме навреме.
