Главниот опозициски кандидат за претседател на Полска, Карол Навроцки, се соочува со сè поголеми критики поради купување на стан од социјално загрозен пензионер, поради што полскиот премиер Доналд Туск го оцени како неподобен за претседателската функција.
Кампањата на Навроцки, кој е поддржан од националистичката опозициска партија Право и правда (ПиС), е потресена од обвинувања дека лажел за поседување друг недвижен имот и дека ја стекнал од повозрасен човек во замена за ветување дека ќе се грижи за него, но не го исполнил тоа ветување.
Навроцки ги отфрли како „медиумски лаги“ тврдењата дека постариот човек завршил во државен дом за пензионери поради недобиената грижа, но во средата изјави дека имотот ќе го донира во добротворни цели.
– Во полската држава, вакви луѓе… во секој случај не би требало да бараат највисоки државни почести, највисоки достоинства како што е претседателската функција, изјави денеска полскиот премиер Доналд Туск.
Лидерот на ПиС, Јарослав Качински, во парламентот изјави дека верува оти скандалот е организиран од полските тајни служби со цел да се влијае врз изборите, но не приложи докази за тоа.
Анкетата на агенцијата Полстер, спроведена на 7 и 8 мај за таблоидот „Супер експрес“, покажа дека поддршката за Навроцки опаднала за повеќе од два процентни поена во споредба со претходната анкета од крајот на април.
Анкетата покажа дека либералниот градоначалник на Варшава, Рафал Тшасковски, од владејачката Граѓанска коалиција на Туск, има поддршка од 32,3 проценти од гласачите, додека Навроцки има 22,7 проценти пред првиот круг на изборите на 18 мај.
Откако аматерскиот боксер и историчар Навроцки се вклучи во претседателската трка, тој се соочува со бура од негативни медиумски извештаи, вклучувајќи и откритие дека во телевизиско интервју се појавил маскиран под псевдоним и го фалил трудот за кој бил заслужен како историчар.
