Германскиот извоз во Соединетите Американски Држави бележи пад по речиси една деценија континуиран раст, покажуваат најновите анализи на Институт за истражување на германската економија (IW). Клучни причини за негативниот тренд се повисоките американски царини и зголемените трошоци за енергија во Германија, што директно ја притиска индустриската продукција.
Според податоците обработени од IW, царинската политика воведена за време на администрацијата на Доналд Трамп особено силно ги погодила автомобилската, хемиската и машинската индустрија. Во меѓугодишна споредба, германскиот извоз во САД во првите три квартали од годинава се намалил за осум проценти, додека во периодот 2016–2024 година во просек растел со стапка од пет проценти годишно.
Автомобилската индустрија најпогодена
Од вкупниот пад на извозот, дури 70 проценти се однесуваат токму на трите најпогодени индустриски гранки. Најизразен е падот кај автомобилската индустрија: извозот на автомобили и автомобилски делови во анализираниот период се намалил за 15 проценти.
IW оценува дека високите американски царини имаат најголемо негативно влијание врз извозот на машини изработени од челик и алуминиум, за кои САД воведоа царинска стапка од дури 50 проценти. Ова значително ја зголемува цената на германските производи на американскиот пазар и ја намалува нивната конкурентност.
Хемиската индустрија под притисок на енергијата
Кај хемиската индустрија, пак, падот на извозот е директно поврзан со намаленото производство, кое е последица на скапите енергенси во Германија. Зголемените трошоци за електрична енергија и гас ја отежнуваат работата на хемиските компании и ја ограничуваат нивната способност за извоз.
Експертите предупредуваат дека, доколку ваквите услови продолжат, Германија би можела да се соочи со подолгорочни последици по својата извозно ориентирана економија, особено на пазарите каде што ценовната конкуренција е пресудна.
