Германскиот министер за одбрана Борис Писториус денеска ја исклучи можноста Германија да им се приклучи на американските и израелските воени напади врз Иран, нагласувајќи дека приоритет останува дипломатското решение и спречувањето на понатамошна ескалација.
Обраќајќи се во рамки на парламентарна дебата за најновите случувања, Писториус истакна дека сè уште е неизвесно колку долго ќе трае војната и дали конфликтот ќе се прошири и на други земји.
„Германија не е страна во војната. Германските вооружени сили нема да учествуваат во овој конфликт“, изјави тој пред пратениците.
Тој додаде дека Берлин ќе направи сè што е во негова моќ за да придонесе кон деескалација и да го спречи ширењето на насилството.
Почитување на меѓународното право
Писториус, кој доаѓа од редовите на Социјалдемократската партија, нагласи дека дебатата за тоа дали акциите на САД и Израел се во согласност со меѓународното право е важна, бидејќи стабилен меѓународен поредок може да постои долгорочно само ако државите ги почитуваат правилата.
Сепак, тој додаде дека иранскиот режим со децении повеќепати го кршел меѓународното право.
„Едно е јасно: израелско-американските напади се насочени против режим кој сака да го уништи Израел“, рече Писториус, додавајќи дека станува збор за режим кој „долги години, всушност со децении, спроведува репресија и терор и на домашен и на меѓународен план“.
