„Трговскиот договор што Европската комисија го постигна со САД ќе донесе привремена стабилност за економските субјекти кои се соочија со ризик од зголемување на американските царини. Но, договорот не е рамноправен“, напиша Адад на социјалната мрежа Икс (поранешен Твитер).
Клучни сектори се поштедени, но принципите остануваат загрозени
Министерот истакна дека Франција ја поздравува одлуката со договорот да се изземат клучните сектори за француската економија, како што се аеронаутиката, алкохолните пијалаци и фармацевтските производи. Исто така, тој изрази задоволство што не се направени никакви отстапки за чувствителниот земјоделски сектор, и што се зачувани европските регулативи во области како што се дигиталната технологија и јавното здравство.
Сепак, според него, долгорочно ова не е одржливо:
„Да бидеме јасни: моменталната состојба не е прифатлива и не може да трае. САД практикуваат економска принуда и целосно ги игнорираат правилата на Светската трговска организација (СТО).“
Состанок во Шкотска: Договорот постигнат од Трамп и фон дер Лајен
Американскиот претседател Доналд Трамп во неделата изјави дека е постигнат договор со Европската унија за воведување унифицирана царина од 15% за европскиот извоз кон САД, по едночасовен состанок со претседателката на Европската комисија Урсула фон дер Лајен во Шкотска.
Како дел од договорот, ЕУ се обврзала на купување на енергенси во вредност од 750 милијарди долари, како и дополнителни инвестиции од 600 милијарди долари во американската економија, изјави Трамп.
Од своја страна, фон дер Лајен го поздрави договорот, нарекувајќи го „добар договор кој ќе донесе стабилност и предвидливост“ од двете страни на Атлантикот.
Извор: N1info.rs
