Бајру, назначен во декември минатата година од претседателот Емануел Макрон, се обидува да одржи малцинска коалиција во длабоко поделено Национално собрание. Сепак, повеќето партии – од крајната десница до радикалната левица – веќе најавија дека ќе гласаат против него.
Необично за француската политика, самиот Бајру го иницираше гласањето. Причината е неговиот план за строга буџетска консолидација – намалување на дефицитот од 5,8% на под 4,6% во 2026 година. Тоа би значело драстични кратења и нови даночни мерки. Најконтроверзно е укинувањето на два државни празника, меѓу кои Велигденски понеделник и 8 мај, денот на победата над фашизмот во Европа.
Опозицијата го нарекува планот „неправеден и премногу строг“, а за 10 и 18 септември се закажани масовни протести.
За да биде соборена владата, потребни се 289 гласови од вкупно 577 пратеници – бројка што според анализите Бајру тешко ќе ја избегне. Ако изгуби, тој и министрите ќе мора да поднесат оставка, а кабинетот ќе остане во технички мандат до именувањето на наследник.
Макрон потоа може да избере нов премиер од своите редови, политичка фигура од друга партија или пак да назначи технократска влада предводена од висок државен службеник. Сепак, во длабоко поделениот парламент секое ново име повторно може да се соочи со недоверба.
Иако изгледите се мали, Бајру би можел да преживее доколку обезбеди поддршка преку отстапки во буџетските мерки. Но, дури и тогаш, неговата влада би функционирала во постојан судир со опозицијата и со ограничен капацитет.
Со оглед на тоа што помина една година од последното распуштање на парламентот во 2024 година, Макрон повторно има уставно право да свика избори. Истражувањата покажуваат дека 63% од Французите сакаат ново гласање, додека крајната десница се надева дека овој пат ќе постигне победа. Но, Макрон досега инсистираше дека тоа не е негова прва опција.
Падот на владата автоматски ќе го блокира предлог-буџетот. Новиот кабинет ќе треба да достави ревидиран документ, но ако до крајот на годината не се избере влада, постои можност буџетот за 2025 да биде продолжен и за 2026 – решение што би ја нарушило фискалната доверба на Франција во очите на ЕУ и кредитните агенции.
Извор: Euronews
