Украинскиот парламент денес го назначи Михајло Федоров за нов министер за одбрана, а тој вети дека ќе ги поттикне иновациите и реформите за зајакнување на војската во војната со Русија.
Новиот министер, 34-годишниот Федоров, претходно беше прв вицепремиер и министер за дигитална трансформација, објави Ројтерс.
Федоров одигра важна улога во обликувањето на високотехнолошкиот одговор на Украина на руските напади, особено помагајќи во подобрувањето на поврзаноста на украинската војска со распоредувањето на терминалот „Старлинк“.
Тој се истакна и во создавањето на таканаречената линија на беспилотни летала, одбранбена формација наменета да и наштети на Русија.
„Денес е невозможно да се бориме против новите технологии користејќи ја старата организациска структура. Потребни ни се сеопфатни промени“, рече Федоров за време на презентацијата на акциониот план пред пратениците пред гласањето.
Тој рече дека негова цел е да ја реформира армијата, да ја подобри инфраструктурата на фронтот, „да ги искорени лагите и корупцијата и да создаде лидерство и доверба како нова култура“.
Федоров рече дека неговите реформи ќе се фокусираат на дигитализација на војската, зголемување на употребата на беспилотни летала и вештачка интелигенција и проширување на употребата на технологијата.
„Повеќе роботи, помалку жртви. Повеќе технологија, помалку жртви“, рече тој.
