Американски федерален судија денеска изјави дека ја продолжил забраната со која се блокира обидот на администрацијата на Трамп да му забрани на Универзитетот Харвард да прима меѓународни студенти.
Судијката Алисон Бароуз од Окружниот суд во Масачусетс во Бостон ја објави својата намера да издаде широка прелиминарна забрана кратко откако администрацијата објави планови за започнување нов, подолг административен процес за забрана на Харвард да прима меѓународни студенти.
Министерката за внатрешна безбедност Кристи Ноам минатиот четврток нареди прекинување на акредитацијата на Универзитетот Харвард во рамките на Програмата за размена на студенти и посетители.
„Оваа администрација го смета Харвард за одговорен за промовирање насилство, антисемитизам и координација со Кинеската комунистичка партија на кампусот“, рече Ноам.
Универзитетот ја тужеше Белата куќа следниот ден поради забраната на Белата куќа. Харвард во својата жалба до судот изјави дека владата не ги следела административните процедури и прописи што го утврдуваат редоследот по кој високообразовните институции можат да бидат лишени од правото да примаат странски студенти. Ова вклучува давање можност на универзитетите да поднесат жалба на оваа мерка, како и 30-дневен период за одговор.
Вршителот на должноста директор на американската Служба за имиграција и царина, Тод Лионс, денеска испрати писмо до Харвард, во кое ја информира високообразовната институција дека има рок од 30 дена да одговори на владата по основите наведени за одземање на правото да прима странски студенти.
Судијката Бароуз на денешното рочиште изјави дека ќе издаде широка прелиминарна забрана за „одржување на статус кво“. Таа ја аргументираше својата намера со можноста дека Харвард и неговите студенти ќе бидат оштетени ако владата се врати на своите првични планови.
