Италијанската премиерка Џорџа Мелони се најде под зголемен притисок од јавноста и синдикатите поради нејзиниот став кон војната во Газа, додека низ Италија се шират протести и штрајкови во знак на солидарност со Палестинците.
Според FT, демонстрациите и националниот генерален штрајк во поддршка на Палестинците го зголемиле притисокот врз премиерката да даде појасен одговор на кризата.
Моќните италијански синдикати повикаа на штрајк кој властите го прогласија за незаконски. Прекини имаше во јавниот превоз, училиштата, железницата и пристаништата, а демонстрантите бараа прекин на израелската офанзива во Газа.
„Револуциите и продолжените викенди не одат заедно. Сè уште верувам дека сето ова не му носи никаква корист на палестинскиот народ. Од друга страна, свесна сум дека ќе предизвика многу тешкотии за италијанскиот народ,“ изјави Мелони пред почетокот на штрајкот.
Десетици илјади луѓе протестираа во Рим и други градови, додека помали групи демонстранти се судрија со полицијата. Во Торино, демонстранти упаднаа на аеродромската писта, поради што таа беше привремено затворена, а потоа беше оштетена и конференциска сала.
Ова е втор генерален штрајк во Италија за две недели — знак на растечкото незадоволство и политичките потешкотии на Мелони. Таа се соочува со остри критики од јавноста поради состојбата во Газа, додека истовремено се обидува да остане во согласност со политиката на американскиот претседател Доналд Трамп, оценува политикологот од Универзитетот во Сари, Даниеле Албертачи.
„Мелони е во непријатна позиција,“ вели Албертачи за FT. „Не може да го игнорира јавното мислење и длабоките емоции кон Палестинците и начинот на кој се води војната. Но, таа сака ставот на Италија да остане што е можно поизраелски во дадените околности.“
Премиерката се наоѓа и во сè поголема изолација во Европа, откако Франција, Велика Британија, Шпанија и други држави ја признаа Палестина. „Може да дава критички изјави, што и го прави, но на крајот – дали врши притисок врз Израел за промена на курсот? Не врши,“ додава Албертачи.
Мелони минатата недела изјави дека признавањето на палестинската државност „без реален суверенитет не го решава проблемот“ и „не нуди конкретни резултати за Палестинците“. Сепак, таа додаде дека Рим ќе ја признае Палестина ако Хамас ги ослободи сите израелски заложници и биде исклучен од идната палестинска влада.
Иако првично цврсто го поддржуваше израелскиот премиер Бенјамин Нетанјаху, Мелони во последно време ја критикува израелската офанзива, нарекувајќи ја „неоправдана и несразмерна“. Сепак, италијанската влада досега презела малку конкретни чекори за да изврши притисок врз Тел Авив.
„Малку е веројатно дека ќе го смени курсот,“ заклучува Албертачи. „Мелони не сака да изгледа како некој што попушта под притисок. Италија ќе остане на страната на САД и ќе чека тие да преземат нешто.“
Извор: N1info.rs
