Листата на најпосетувани градови во светот минатата година ја состави Euromonitor International, врз основа на параметри како што се туристичките посети, одржливоста и економскиот аспект на посетите на градовите ширум светот.
Париз е најатрактивниот град за туристите веќе четврта година по ред. Мадрид и Токио беа втора и трета најпопуларна дестинација, додека Рим беше на четврто место. Изненадување се двете дестинации кои привлекоа милиони туристи во однос на пристигнувањето и транзитот на патници во текот на 2024 година – Бангкок и Истанбул.
Euromonitor International е светски лидер во анализа на податоци и истражување на пазарот, индустријата, економијата и потрошувачите. Компанијата има 16 канцеларии ширум светот и се занимава со туризам и аналитички податоци во над 210 земји низ светот.
Истражувањето спроведено од гореспоменатата компанија се заснова на 55 различни метрики, поделени во шест клучни области кои се однесуваат на 100 градови низ светот. Параметрите се: економија и бизнис, туризам, туристичка инфраструктура, туристичка политика со атрактивноста на градовите, безбедност и здравје и одржливост.
На туристичките списоци најмногу се најдоа европските градови, се вели во годишниот извештај на компанијата. Претходната година забележан е зголемен број посети на неевропски градови. Во рангирањето се издвојува Азија, со два града кои влегоа во првите десет омилени дестинации.
Градовите на развиените пазари напредуваат поради зголемената побарувачка за патувања во 2024 година, при што глобалните меѓународни пристигнувања забележаа пораст од 19 проценти во претходната година.
Европа остана најпопуларна, достигнувајќи 793 милиони меѓународни патувања за една година. Бангкок беше на врвот на листата на меѓународни пристигнувања по град со 32,4 милиони патувања во 2024 година.
„Во 2024 година, големите градови користеа спортски и културни настани за да ги зголемат приходите од туризмот. Подобрувањата на инфраструктурата и континуираниот маркетинг го привлекоа вниманието на патниците, отворајќи подобар профит и раст. Се уште постои загриженост за прекумерниот туризам, па се зголемени давачките – такси и даноци“, посочува претставникот на компанијата.
Бангкок е скапоцен камен, изненадување во однос на меѓународните пристигнувања
Бангкок, главниот град на Тајланд, во 2024 година го посетиле 32,4 милиони туристи, што е за околу 37 отсто повеќе од претходната година. На второ место по бројот на туристички посети е Истанбул, кој го посетиле 23 милиони луѓе, а прв на листата во 2023 година.
