Европската агенција за лекови (EMA) се придружи на стручните медицински мислења, истакнувајќи во вторникот дека парацетамолот е безбеден за употреба во текот на бременоста и дека нема докази што го поврзуваат со аутизам, спротивно на тврдењата што оваа недела ги изнесе американскиот претседател.
Во понеделникот, Белата куќа објави дека идентификувала врска меѓу користењето на парацетамол за време на бременоста (во САД познат под името Tylenol) и аутизмот кај децата.
Претседателот Доналд Трамп отиде и подалеку, тврдејќи дека „Tylenol не е добар“ и дека бремените жени треба да „се борат со сета сила“ да избегнуваат да го земаат. Тој уште за време на викендот најави дека „мисли дека конечно е најден одговорот за аутизмот“.
EMA: Нема докази што ги поддржуваат овие тврдења
Европската агенција за лекови изјави дека нема нови докази кои би барале промена на постојаните препораки во ЕУ.
„Нема нови докази што би наложиле промена во актуелните препораки за употреба на парацетамол“, изјави портпарол на EMA за Euronews.
Во 2019 година, агенцијата веќе ги разгледала студиите поврзани со невроразвојот на деца чии мајки користеле парацетамол во бременоста и тогашниот заклучок бил дека наодите се неубедливи и не покажуваат поврзаност со невроразвојни нарушувања.
EMA сега повторува дека обемни податоци собрани од бремени жени кои користеле парацетамол не покажуваат зголемен ризик од деформации кај фетусот или кај новороденчињата – информација која веќе е вклучена во упатствата за употреба на производите во ЕУ.
„Кога е потребно, парацетамол може да се користи за време на бременоста. Сепак, се препорачува да се користи во најниска ефикасна доза, во најкратко можно времетраење и што е можно поретко“, додаде портпаролот.
Како и за сите лекови, EMA и националните тела во ЕУ постојано вршат мониторинг на безбедноста на производите што содржат парацетамол.
Политички контекст
Објавата на администрацијата на Трамп дојде по ветувањето на американскиот министер за здравство Роберт Ф. Кенеди Џуниор во април дека ќе ја идентификува причината за аутизмот до септември.
Како што претходно извести Euronews, најавата од САД предизвика силни реакции од страна на експерти за детско здравје.
Научниците во голема мера веруваат дека аутизмот е предизвикан од комбинација на генетски и еколошки фактори, меѓу кои се: повозрасни родители, пренатално изложување на загаден воздух, и ниско ниво на кислород при раѓање.
