Европските регулатори за дигитални технологии во петокот ја обвинија социјалната мрежа TikTok за кршење на правилата на Европската унија за онлајн содржини, наведувајќи дека апликацијата користи зависнички дизајнерски механизми кои можат сериозно да им наштетат на корисниците, особено на децата и ранливите групи.
Европската комисија предупреди дека TikTok би можел да биде принуден да го промени основниот дизајн на апликацијата или да се соочи со парична казна до 6% од глобалниот годишен промет на својата матична компанија ByteDance.
Прелиминарни наоди по едногодишна истрага
Обвинувањата се дел од прелиминарните наоди на едногодишната истрага спроведена согласно Актот за дигитални услуги (DSA), кој ги обврзува големите онлајн платформи да преземат поостри мерки против незаконска и штетна содржина, како и против дизајни што поттикнуваат зависност.
Комисијата посебно се фокусирала на дизајнот на TikTok, вклучувајќи: бесконечно скролање, автоматско пуштање видеа, push-известувања и високо персонализиран систем за препораки.
Според регулаторите, овие функции постојано генерираат нова содржина и ги „наградуваат“ корисниците, што ги турка во состојба на компулсивно користење и „автопилот“ однесување.
Загриженост за менталното здравје
Европската комисија смета дека TikTok не направил соодветна проценка за тоа како ваквите функции влијаат врз физичкото и менталното здравје на корисниците. Особено загрижува фактот што, според регулаторите, платформата ги игнорирала показателите за прекумерна употреба кај малолетници, како што се долгото користење на апликацијата во ноќните часови, честото отворање на апликацијата во кратки временски интервали.
ЕУ регулаторите наведуваат дека TikTok не вовел доволно ефикасни заштитни механизми, како алатки за ограничување на времето пред екран и родителски контроли, и дека се неопходни суштински промени во дизајнот на услугата во Европа.
TikTok ги отфрла обвинувањата
TikTok ги отфрли тврдењата на Европската комисија. Портпарол на компанијата изјави дека прелиминарните наоди претставуваат „категорично неточен и целосно неоснован приказ“ на платформата и најави дека компанијата ќе ги искористи сите правни механизми за да ги оспори заклучоците.
Според процедурите, TikTok сега има право на увид во документацијата на Комисијата и можност да достави писмен одговор пред донесувањето на конечната одлука.
