Делегацијата на Европската Унија во Србија, заедно со амбасадите на речиси сите земји членки на ЕУ, издаде соопштение по повод едногодишнината од падот на бетонската настрешница на железничката станица во Нови Сад, во којa животот го загубија 16 лица.
„Како земја која ќе одбележи година од трагичниот пад на настрешницата на железничката станица во Нови Сад, сакаме уште еднаш да изразиме најдлабоко сочувство и искрена солидарност со семејствата и блиските на загинатите,“ се наведува во соопштението. Од Делегацијата на ЕУ додаваат дека трагедијата оставила „длабока рана во срцата на многумина во Србија и пошироко“, повикувајќи јавноста достоинствено и мирно да се сети на жртвите.
Во соопштението се потенцира дека почитувањето на основните човекови права и вредности, меѓу кои слободата на мирно собирање и слободата на медиумите, претставуваат клучни европски принципи кои мора да се заштитат и поддржат. „Апелираме сите да делуваат воздржано, да ги смират тензиите и да избегнат насилство,“ порачаа од ЕУ.
Европската Унија нагласи дека останува „непоколеблив партнер на Србија и нејзиниот народ“, додавајќи дека заедничката цел е напредокот на земјата на патот кон ЕУ преку дијалог, меѓусебно почитување и конкретен напредок во реформите — особено во областите на владеењето на правото, изборниот систем и медиумските слободи.
Соопштението е потпишано од Делегацијата на Европската Унија во Србија и амбасадите на Белгија, Бугарија, Чешка, Данска, Германија, Естонија, Ирска, Грција, Шпанија, Франција, Хрватска, Италија, Кипар, Летонија, Литванија, Луксембург, Малта, Холандија, Австрија, Полска, Португалија, Романија, Словенија, Словачка, Финска и Шведска. Единствена земја членка што не го потпишала документот е Унгарија.
