Преку иницијативата DiscoverEU, која е дел од програмата Erasmus+, сите 17-годишници родени меѓу 1 јануари и 31 декември 2007 година можат да аплицираат и да патуваат низ Европа до 30 дена во периодот од март 2026 до мај 2027 година.
Пријавите се отворени до 13 ноември 2025, а аплицирањето се врши преку Европскиот младински портал, со краток квиз за Европската Унија. Избраните учесници ќе добијат патувачки билет и попустна картичка која важи во 36 земји, со поволности за јавен превоз, сместување, храна, култура и забава.
DiscoverEU има за цел да го поттикне културниот дијалог и одржливиот туризам меѓу младите Европејци. Програмата е достапна не само за државите членки на ЕУ, туку и за земјите поврзани со Erasmus+.
Посебна поддршка е предвидена за учесници со попреченост или здравствени ограничувања, на кои им се овозможува пристапно патување со придружник. Европската комисија нагласува дека иницијативата ги одразува вредностите на инклузија, одржливост и мобилност, кои се основа на програмата Erasmus+.
Патниците можат сами да го планираат своето патување или да изберат една од тематските рути.
Меѓу нив е „New European Bauhaus Route“, која ги вклучува градовите што промовираат одржливост и инклузивност, како и „DiscoverEU Green Route“, која ги нагласува еколошките дестинации – градови носители на титулите European Green Capital и Green Leaf Award.
Учесниците добиваат и совети за „зелено патување“ и алатки за планирање со низок еколошки отпечаток, со што DiscoverEU ја поддржува Европската зелена агенда и целите на European Green Deal.
Иницијативата беше започната во 2018 година на предлог на Европскиот парламент, а од 2021 година е трајно интегрирана во Erasmus+ програмата. Досега, повеќе од 1,6 милиони млади лица аплицирале, а 391.000 добиле патувачки пасоши.
Истражувањата покажуваат дека за 63% од учесниците, ова било првото меѓународно патување со воз, а за две третини – прво патување без родители.
DiscoverEU создаде и активна заедница со над 110.000 членови во официјалната група #DiscoverEU, каде младите разменуваат искуства, совети и идеи за патувања.
Со оваа нова можност, Европа го слави спојот на младоста, слободата и културната размена, потсетувајќи дека Шенген-зоната не е само политички договор, туку вистински симбол на европско единство, мобилност и можности.
Извор: ftnnews
