Полицијата уапсила 43 демонстранти во центарот на Истанбул, соопштил турскиот министер за внатрешни работи Али Јерликаја на социјалните мрежи.
Во понеделникот навечер повторно беше одржан митинг на опозицијата на плоштадот Сарачане, во близина на градската општина, на кој присуствуваа повеќе илјади луѓе, пренесува агенцијата Риа Новости. Помали групи демонстранти исто така се обиделе да организираат демонстрации во други делови на Истанбул, соопштува агенцијата.
Демонстрациите започнаа во Истанбул минатата среда кога градоначалникот Екрем Имамоглу, главен ривал на претседателот Реџеп Тајип Ердоган, беше приведен по обвиненија за корупција.
Судирот со безбедносните сили ескалираше во неделата навечер, откако полицијата испали солзавец и гумени куршуми кон демонстрантите, пренесува британскиот јавен сервис.
Судот во неделата донесе одлука Имамоглу да остане во притвор до почетокот на судењето за наводна корупција и тероризам. Имамоглу ги негира обвиненијата, а властите го суспендираа од функцијата градоначалник на Истанбул додека е во истражен притвор
Инаку тој е најистакнатиот политичар на опозициската Републиканска народна партија (CHP) и најголемиот политички противник на претседателот Реџеп Тајип Ердоган.
