Најмалку 12 лица загинаа во експлозија во продавница за огномет во централна Кина, за време на прославите на Лунарната Нова година. Несреќата се случила во средата попладне во градот Сјангјанг, во провинцијата Хубеи, пренесуваат државните медиуми.
Според информациите, експлозијата целосно ја разурнала продавницата, по што избувнал пожар. Екипите за итна интервенција успеале брзо да го локализираат и изгаснат огнот, но 12 лица го загубиле животот – пет деца и седум возрасни.
Меѓу жртвите се сопственикот на продавницата и купувачи кои во тој момент набавувале огномет за празничните прослави. Дел од нив допатувале од други региони за да ги посетат своите семејства за време на празниците.
Властите започнале истрага за причините за експлозијата, но засега не се соопштени дополнителни детали.
Ова е втора смртоносна експлозија поврзана со огномет во последните неколку дена. Во неделата, во провинцијата Џиангсу, осум лица загинаа, а две беа повредени во сличен инцидент. Локалните власти тогаш соопштија дека жител запалил огномет во близина на објектот, што довело до експлозијата.
Огнометот традиционално има централно место во прославите на Лунарната Нова година во Кина. Семејствата палат петарди и огномет за да ја одбележат новата година, да привлечат просперитет и да ја „избркаат“ лошата среќа. Но масовната употреба секоја година носи и сериозни безбедносни ризици.
По последните несреќи, кинеското Министерство за управување со вонредни состојби издаде нови предупредувања. Во соопштение од вторникот, министерството наведе дека огнометот останува „најголемиот ризик за време на пролетниот фестивал“, повикувајќи ги регионалните власти да ја зајакнат контролата врз индустријата.
Ден претходно, централните власти им наложија на сите региони да извлечат поуки од инцидентот во Џиангсу, да спроведат сеопфатни проценки на ризик и да преземат мерки за спречување на слични трагедии.
Во изминатите години, многу кинески градови воведоа ограничувања или целосни забрани за огномет, најчесто поради загадување на воздухот и безбедносни причини. Сепак, дел од локалните власти во последно време ги ублажија строгите забрани и дозволија регулирана употреба за време на празниците.
Последните трагедии повторно ја отвораат дебатата за балансот меѓу традицијата и јавната безбедност во периодот на најголемите национални прослави.
