ЏЕК Шлосберг, 32-годишниот внук на поранешниот американски претседател Џон Ф. Кенеди, следната година планира да се кандидира за Конгресот, пишува New York Times.
Шлосберг е син на ќерката на Џ.Ф. Кенеди, поранешната дипломатка Каролин Кенеди, и на дизајнерот и уметникот Едвин Шлосберг. Веста за својата прва кандидатура за јавна функција ја објави синоќа преку електронска пошта испратена до своите приврзаници, пренесува нјујоршкиот медиум. Според тој извор, 32-годишникот ќе бара номинација од Демократската партија за местото во Претставничкиот дом на американскиот Конгрес кое го напушта ветеранот демократ Џеролд Надлер.
Шлосберг е политички коментатор и писател чиј труд бил објавуван во медиуми како Washington Post, Politico и Time. Со својата амбиција се придружува на веќе бројната група кандидати за 12. конгресен округ.
„Без контрола над Конгресот не можеме да направиме речиси ништо“
Надлер (78) најави повлекување следната година во септември. Тој бил во Претставничкиот дом повеќе од 30 години, а во својата најавa призна дека во партијата постојат се поголеми повици да се отвори простор за помладата генерација лидери.
Одлуката на Шлосберг доаѓа во момент кога демократите се обидуваат да ја вратат контролата над Претставничкиот дом на изборите за средината на мандатот во 2026 година, со цел да го отежнат законодавниот процес за претседателот Доналд Трамп и неговите републиканци кои во моментот држат мнозинство во двата дома.
„Нема ништо што нашата партија не може да направи за да се справи со трошоците за живот, корупцијата и уставната криза во која се наоѓаме“, рече Шлосберг во разговор за Times. „Но без контрола над Конгресот, речиси ништо не можеме да направиме“, додаде тој.
Ја поддржуваше Камала Харис
Шлосберг е единствениот внук на Џ.Ф. Кенеди, претседателот убиен во 1963 година. Јавноста го забележа за време на втората вечер на Демократската национална конвенција во 2024 година во Чикаго, каде одржа говор во поддршка на тогашната потпретседателка Камала Харис во нејзината претседателска кампања.
Некои од коментарите на Шлосберг биле насочени против неговиот братучед Роберт Ф. Кенеди младши, денес министер за здравство во администрацијата на Трамп.
Влезот на Шлосберг во политика следи по метеорскиот успех на друг млад милиенијалец од Њујорк, Зохран Мамдани (34), градски советник кој минатата недела беше избран за градоначалник на Њујорк. Како и Мамдани, Шлосберг е вешт со социјалните мрежи и има над 830 илјади следбеници.
