Денес земјава ќе биде под влијание на влажна и нестабилна воздушна маса, што ќе донесе зголемена облачност и повремени врнежи од дожд низ поголем дел од земјата. Според прогнозата, дождот ќе биде поизразен во утринските и претпладневните часови, додека во попладневните се очекува постепено слабеење и разведрување.
Минималните утрински температури ќе се движат меѓу 3 и 8 степени, додека максималните дневни ќе достигнат од 12 до 17 степени Целзиусови. Ќе дува слаб до умерен ветер од променлив правец.
Метеоролозите предупредуваат и на уште една појава која ќе го одбележи времето – сахарска прашина во атмосферата. Поради јужно струење во повисоките слоеви на атмосферата, кон Балканот се транспортира прашина од северна Африка. Ова може да предизвика заматено небо и намалена видливост на хоризонтот.
Кога оваа прашина ќе се измеша со врнежите, можно е да се појави таканаречен „валкан дожд“, односно дожд со ситни честички прашина кој остава видливи траги на возилата, прозорците и другите површини.
Времето во Скопје
Во главниот град утре се очекува променливо облачно време со повремени врнежи, особено во утринските часови. Во текот на попладнето врнежите ќе престануваат, а облачноста постепено ќе се намалува.
Поради присуството на сахарската прашина, можно е небото да добие жолтеникава нијанса, а дождот да остави траги од прашина на површините.
Според прогнозите, од петок времето ќе се стабилизира, со повеќе сончеви периоди и постепено намалување на концентрацијата на прашина во воздухот. За време на викендот се очекува претежно сончево и потопло време, со температури кои ќе достигнуваат до 17 степени.
