Војната против Иран ќе трае сè додека американскиот претседател Доналд Трамп не заклучи дека се постигнати воените цели на операцијата „Епски бес“ и дека Иран е во позиција на целосно предавање, изјави портпаролката на Белата куќа, Каролине Левит.
„Првичната проценка беше дека ќе бидат потребни четири до шест недели за да се постигнат сите цели. Тоа вклучува уништување на проектили и нивните производствени капацитети, уништување на иранската морнарица, трајно оневозможување на развојот на нуклеарно оружје и ослабување на терористичките посреднички групи во регионот“, рече Левит.
Таа додаде дека американската војска ги остварува целите побрзо отколку што било планирано. „Нашите храбри војници многу ефикасно ги спроведуваат целите и во тоа се значително пред распоредот“, нагласи таа.
Сепак, Левит потенцираше дека конечната одлука за завршетокот на операцијата ќе ја донесе Трамп како врховен командант. „Операциите ќе завршат кога врховниот командант ќе процени дека воените цели се целосно остварени и дека Иран е во позиција на целосно и безусловно предавање – без разлика дали тие тоа ќе го признаат или не.“
Војната меѓу Соединетите Американски Држави, Израел и Иран започна на 28 февруари, кога беа покренати големи воздушни и ракетни напади врз иранските воени цели. Во првите часови на нападот беа погодени бази на проектили, системи за противвоздушна одбрана и командна инфраструктура, при што беше убиен и иранскиот врховен лидер ајатолах Хамнеи. Иран потоа возврати со стотици проектили и дронови насочени кон американските бази и цели во регионот.
Денес, 12 дена подоцна, конфликтот прерасна во широк регионален војна што вклучува напади врз воени цели, енергетска инфраструктура и поморски сообраќај во Персискиот залив. Хормушкиот теснец, еден од најважните светски поморски патишта, е практично блокиран.
