Целокупниот систем во Република Северна Македонија затајува и секојдневно ни ја докажува неговата нефункционалност. Постојано сведочиме како отсуството на правда стимулира девијантно и криминално однесување, а тоа мора да се промени.
На форумот „Кој губи, а кој добива од неказнивоста?“, сите заинтересирани граѓани ќе имаат можност да дискутираат за недостатоците на правниот систем, избегнувањето на одговорноста, неказнивоста и можните решенија по овие прашања. Додека малцинството привилигирани дивеат и не понесуваат одговорност за своите постапки, сите ние ги трпиме последиците. Затоа, неправдата мора да престане!
Целта на овој форум е да произлезат автентични решенија од самите граѓани, почнувајќи од системот за работа со деца и млади во судир со законот, па сè до реформите во правосудството. Ваквиот транспарентен начин на вклучување на граѓаните во овие процеси е повеќе од неопходен, особено ако земеме предвид дека националното правосудство „ужива“ народна доверба од само 2%.
Не смееме да заборавиме дека Фросина, но и сите други досегашни и потенцијални идни жртви се индиректна последица на системот кој не казнува. Последното сообраќајно злосторство само ги извади на виделина сите недостатоци на правниот систем – што ни потврдува дека одговорност мора да има, не само за убиецот, туку и за сите алки во системот кои му овозможиле да продолжи со своето деструктивно однесување. Решенија има, но дали има волја да направиме реални промени?
Затоа, време е сите заедно да застанеме зад мерките што ќе ја вратат правдата во системот, кои ќе ја вратат довербата кај граѓаните и ќе гарантираат сигурност во нашите домови, на улиците каде што живееме, работиме и се движиме секојдневно. Потребни сме му на градот и општеството како заедница која бара одговорност, правда и безбедност за сите! Форумот е отворен за сите заинтересирани граѓани.
