Мисијата „Артемис II“ веќе е во тек, откако НАСА на 1 април успешно ги испрати четворицата астронаути со ракетата SLS од Кенеди центарот во Флорида. Станува збор за првата човечка мисија кон Месечината по повеќе од 50 години и за лет што треба да трае околу 10 дена.
Во моментов, екипажот не е уште на пат директно кон Месечината. По влегувањето во вселената, „Орион“ ги распореди соларните панели и влезе во елиптична, а потоа и во висока орбита околу Земјата. Според НАСА, леталото треба да остане во оваа орбита околу еден ден, период во кој астронаутите и контролата на мисијата ги проверуваат клучните системи и изведуваат тестови за управување со леталото.
Токму оваа фаза е и најважната потврда дали мисијата ќе продолжи според планот. Додека „Орион“ е уште релативно блиску до Земјата, евентуалното враќање е многу поедноставно ако се појави проблем што не може да се реши во лет. Ако сите системи останат стабилни, следи таканаречениот translunar injection burn, односно околу шестминутно палење на моторот што треба да го оттурне леталото од Земјината орбита и да го насочи кон Месечината. НАСА наведува дека токму овој маневар е планиран за денес.
Патеката на мисијата не предвидува слетување, туку прелет околу Месечината и враќање назад кон Земјата со помош на нејзината гравитација. Според планот на НАСА, екипажот треба да мине покрај Месечината на 6 април, кога астронаутите ќе фотографираат делови од површината, вклучително и области од далечната страна што луѓе досега не ги набљудувале на овој начин.
Мисијата воедно е и технички тест за сè што ќе им биде потребно на идните човечки летови подлабоко во вселената. НАСА сака со „Артемис II“ да провери како функционираат системите за животна поддршка, комуникација и управување во реални услови со екипаж, пред идните мисии што треба да ја доближат програмата до повторно човечко присуство на Месечината.
Покрај големите технички прашања, вниманието го привлече и еден многу приземен детал: како екипажот ќе оди во тоалет за време на летот. Пред полетувањето имало мал проблем со тоалетниот систем, но инженерите го расчистиле и дале зелено светло за мисијата. Во извештаите од лансирањето се посочува дека НАСА со години развива посовремен систем за управување со отпад во микрогравитација, затоа што и таквите „мали“ решенија се клучни кога патувањето трае со денови и нема простор за импровизација.
Засега, најкраткиот одговор на прашањето „до каде е Артемис II?“ е овој: леталото е во висока орбита околу Земјата, ги поминува последните проверки и го чека маневарот што треба да ја отвори вистинската траекторија кон Месечината. Ако тој чекор помине според планот, мисијата ќе влезе во својата највозбудлива фаза
