Дипломатско-криминален скандал излезе на виделина со одлуката на Уставниот суд на Хрватска, кој привремено го стопираше извршувањето на решението на Министерството за внатрешни работи за депортација на жена од територијата на ЕУ, како и на две пресуди кои го потврдуваат тоа решение.
Како што пренесува загрепски N1, државјанката на Гана, која моментално се наоѓа во Прифатилиштето за азил, поднела барање за меѓународна заштита поради, како што се наведува, хоророт кој го преживеала во домот на ирачкиот конзул. Тие додаваат дека има потврда од владата која укажува дека таа била работно искористувана, односно дека била жртва на трговија со луѓе.
Сè започнало пред неколку години кога таа дошла во Хрватска, а ирачкиот конзул ѝ ги одзел идентификациските, патните и другите документи, вклучувајќи ја и потврдата за вакцинација. Покрај тоа, како што наведува во уставната жалба, ѝ била ограничена слободата на движење.
Од документите кои се јавни и достапни е очигледно дека оваа жена дошла во Хрватска за да чува деца во домот на конзулот, но на крајот се испоставило дека треба да биде на располагање на конзулот и на неговото семејство во секое време од денот и за секаква помош во куќата. Условите под кои работела биле, според нејзиното тврдење, нечовечки. Имало и заканување, контрола, насилство, неплаќање, па дури и изнудување.
“Мораше да работам секој ден во неделата, без ниту еден слободен ден, и тоа од 7 до 21 или 22 часа. Конзулот не ми исплаќаше плата за извршениот труд. Понатаму, своеволно го намали договорениот износ на 200 долари, за потоа, по неколку месеци, да престане да ми плаќа нешто”, опишала во уставната жалба државјанката на Гана.
“Секогаш кога се обидував да разговарам со конзулот за условите на работа или да ги побарам моите документи, тој ми закануваше дека ќе ме депортира назад во Гана и дека ќе морам да му ги вратам трошоците кои ги имал поради моето доаѓање во Хрватска. Тие трошоци се однесуваа на документи, патување и облека, а јас немав средства за тоа”.
Извор: Танјуг
