Војната на Блискиот Исток влезе во деветтиот ден, додека нападите меѓу Израел и Иран продолжуваат да се интензивираат и да го зафаќаат целиот регион.
Според последните информации, најмалку четири лица загинале откако бил погоден хотел во Бејрут. Израелската војска соопшти дека нападот бил насочен кон команданти на Иранската револуционерна гарда кои наводно се наоѓале во либанската престолнина.
Во меѓувреме, од Техеран пристигнуваат снимки што на социјалните мрежи се опишуваат како апокалиптични сцени. Израелските сили погодиле складишта со нафта во иранската престолнина, по што се појавиле големи пожари и густ чад над градот.
Рускиот амбасадор во Обединетото Кралство изјави дека Москва не е неутрална во конфликтот, туку дека стои на страната на Иран.
Израелски разузнавачки извори во меѓувреме тврдат дека синот на иранскиот врховен лидер, Моџтаба Хамнеи, е жив, но бил ранет во неодамнешен напад.
Иранскиот министер за надворешни работи соопшти дека американските сили погодиле постројка за десалинизација на вода, што предизвикало проблеми со снабдувањето со вода во околу 30 села.
Американскиот претседател Доналд Трамп, коментирајќи го иранското раководство, изјави дека тие би можеле да употребат нуклеарно оружје и дека, според него, американските акции „му направиле услуга на светот“.
