По појавувањето на Jim Carrey на свеченоста на Cesar Awards на 26 февруари, фотографиите од настанот станаа вирални и предизвикаа бројни шпекулации на социјалните мрежи. Дел од корисниците тврдеа дека на церемонијата не присуствувал вистинскиот актер, туку негов „двојник“ или дури „клон“, поради поинаквиот изглед – подолга коса и посветла боја на очите.
Коментарите на платформата X брзо се проширија, а некои одеа дотаму што тврдеа дека актерот бил клониран пред години. Други пак шпекулираа дека целата ситуација е маркетиншки трик поврзан со нов филмски проект. Теориите на заговор дополнително ја разгореа дискусијата и предизвикаа лавина реакции.
Официјалните претставници на актерот ги демантираа ваквите тврдења, истакнувајќи дека тој лично присуствувал на настанот. И организаторите на наградите потврдија дека неговото доаѓање било планирано со месеци однапред. Според нив, Кери дури учел француски јазик неколку месеци за да одржи говор, а на церемонијата бил придружуван од членови на своето семејство.
Забуната дополнително се зголеми кога британскиот трансформациски уметник Alexis Stone објави фотографија од Париз на која се појавува маскиран како Џим Кери. Со помош на протетика и шминка, Стоун често имитира познати личности, што во овој случај придонесе за дополнителна конфузија на социјалните мрежи.
И покрај официјалните објаснувања, шпекулациите продолжуваат да кружат онлајн, уште еднаш покажувајќи колку брзо дезинформациите можат да се прошират во дигиталната ера.
