Малопродажните цени на дизелот во САД го достигнаа највисокото ниво за речиси две години, покажуваат податоците од автомобилскиот клуб ААА, истакнувајќи ги последиците од прекините во снабдувањето од Блискиот Исток.
Просечната малопродажна цена на дизелот денес изнесуваше 4,166 долари за галон, што е за 3,2 проценти повеќе од вчерашниот просек, покажуваат податоците на Американскиот автомобилски клуб.
Споредбата со минатата недела, пред американско-израелскиот напад врз Иран, покажува зголемување на цената од приближно 11 проценти. Во споредба со просекот од минатата година, дизелот е поскап за речиси 14 проценти.
Цените на бензинот, исто така, се зголемија, при што просечната цена на бензинските пумпи во четврток изнесуваше 3,251 долар за галон. Тоа е за 1,6 проценти поскапо од вчерашниот просек, според ААА. Споредбата со просекот од минатата недела покажува зголемување од девет проценти. Во споредба со просекот од минатата година, цената е повисока за 4,6 проценти.
Пазарот на дизел е почувствителен на конфликти на Блискиот Исток бидејќи поголемиот дел од нафтата од тој регион е особено погодна за негово производство, објаснува директорот на StoneX, Алекс Хоудс.
Според фирмата за следење на товарот „Вортекс“, производителите во Персискиот Залив дневно испорачуваат околу 900.000 барели дизел и околу 350.000 барели млазно гориво. Тоа е околу 20 проценти и 10 проценти од глобалните пратки до клиентите по море, соодветно.
