YouTube годинава првпат ќе го пренесува Coachella во 4K, со што домашното следење на фестивалот добива досега најамбициозна дигитална верзија. Стримот почнува на 10 април во 16 часот по пацифичко време, а и двата фестивалски викенда ќе може да се следат бесплатно преку YouTube и официјалниот Coachella канал.
Оваа година седум сцени ќе се пренесуваат истовремено, а најголемата новина е што Coachella Stage, Outdoor Theatre и Sahara ќе добијат 4K пренос. За гледачите што следат на телевизор, YouTube воведува и multiview, опција со која можат да се гледаат до четири сцени во исто време и да се менува аудиото меѓу нив.
Фестивалот ќе добие и поинаков визуелен агол. Quasar сцената ќе има посебен вертикален лајв стрим снимен целосно со Google Pixel уреди, што е и директен технолошки излог за камерите на телефоните. Паралелно ќе работи и 24-часовен канал „Coachella TV“, на кој ќе се вртат архивски настапи и најважните моменти од изданието за 2026 година.
Во вториот викенд се враќа и форматот „Watch With“, во кој креатори и артисти заедно коментираат настапи во живо. YouTube најавува и виртуелна продавница за фестивалски merch, како и посебна Coachella livestream апликација за Android и iOS, со алатки за планирање на распоредот. Со други зборови, Coachella сè повеќе не е само фестивал во пустина, туку и целосно продуцирано дигитално искуство за публика што не е таму физички.
