ChatGPT, најпознатиот чет-бот на OpenAI, доби нова мемориска функција што му овозможува да ги памети информациите од претходните разговори со корисниците. Целта е да се создаде поусогласено и персонализирано корисничко искуство, кое повеќе личи на природен, човечки дијалог.
Во објава преку платформата X (поранешен Twitter), OpenAI потврди дека ChatGPT сега може да се повикува на стари разговори, што резултира со поцелосни и покорисни одговори. Од сега, секој нов разговор ќе се чувствува повеќе прилагоден на конкретниот корисник, врз основа на неговите претходни интеракции и преференци.
И покрај новитетот, функцијата за меморија е изборна. Корисниците можат да ја исклучат, со што ChatGPT нема да има пристап до претходните разговори. Ова овозможува флексибилност за оние кои се загрижени за приватноста или сакаат интеракции без „траги“.
Иако глобално е достапна, корисниците од Европската економска зона, Обединетото Кралство, Швајцарија, Норвешка, Исланд и Лихтенштајн нема да ја добијат оваа функција – барем засега. OpenAI не прецизираше дали и кога оваа функција ќе биде достапна за европските корисници.
Неколку недели претходно, OpenAI ја воведе и функцијата за генерирање слики во бесплатната верзија на ChatGPT, што доведе до огромен пораст на сообраќај. Генералниот директор Сем Алтман изјави дека побарувачката краткотрајно ги преоптоварила капацитетите на компанијата за обработка со GPU.
За сега, функцијата за меморија е достапна само за корисници со Plus и Pro претплата, а се очекува да биде достапна и за Team, Enterprise и Edu корисници во следните недели. Европските корисници, сепак, засега остануваат надвор од играта.
