Нјамалку 42 мигранти се водат како исчезнати и се верува дека се мртви откако чамец се преврте покрај либискиот брег, соопшти денес Меѓународната организација за миграција (ИОМ). Либиските власти спасија седум преживеани кои шест дена пловеа на море откако брод со 49 лица потона во близина на нафтеното поле Ал Бури, објект на море северозападно од либискиот брег.
ИОМ соопшти дека мигрантите биле од Судан, Нигерија, Камерун и Сомалија. Либија стана транзитна рута за мигрантите кои бегаат од конфликти и сиромаштија преку Медитеранот кон Европа по падот на диктаторот Моамер Гадафи во 2011 година за време на востанието поддржано од НАТО.
Повеќе од 1.000 мигранти веќе се удавија во централниот Медитеран оваа година, соопшти ИОМ, а несреќата од оваа недела „дополнително го зголеми“ тој број. Податоците на ИОМ покажуваат дека 2.452 лица се удавиле во целиот Медитеран во 2024 година.
„Овој трагичен настан, кој се случува само неколку недели по другите смртоносни инциденти кај Сурмана и Лампедуза, ги истакнува постојаните опасности со кои се соочуваат мигрантите и бегалците долж Централномедитеранската рута“, соопшти ИОМ.
На крајот на октомври, телата на 61 мигрант беа пронајдени на брегот западно од главниот град Триполи. Во септември, ИОМ објави дека најмалку 50 лица загинале откако брод што превезувал 75 судански бегалци се запалил покрај либискиот брег.
Вчера, неколку земји, вклучувајќи ги Велика Британија, Шпанија, Норвешка и Сиера Леоне, на состанокот на ОН во Женева ја повикаа Либија да ги затвори центрите за притвор каде што, според групите за човекови права, мигрантите и бегалците се жртви на тортура, злоупотреба, а понекогаш и убиства.
