На утрешната седница на Собранието на Србија, пратениците ќе расправаат за дури 62 точки од дневниот ред, а меѓу клучните прашања се измените и дополнувањата на Законот за високо образование, како и изборот на нов министер за одбрана по оставката на Милош Вучевиќ.
Во меѓувреме Ана Брнабиќ, гостувајќи во емисија на телевизијата К1 им се закани на студентите дека се на прагот на тоа да ја изгубат годината.
„Утрешната седница е исклучително важна, бидејќи на дневен ред имаме многу точки кои се од значење за нашите граѓани. Првично ја планиравме седницата за крајот на јануари, но токму тогаш се одржа колегиумот, на кој дознавме за оставката на премиерот, па беше бесмислено да ја одржиме тогаш. Мораме да се придржуваме до утврден начин на работа – прво расправаме за сите предлози на закони и ратификации на договори, потоа за барањето на опозицијата за гласање за доверба кон мене, а на крај констатираме оставка на премиерот. Овој редослед е важен, особено поради измените и дополнувањата на Законот за високо образование, кои ќе стапат на сила по конкретизацијата на студентите во Пленумот. Вкупното издвојување е 18 милијарди динари и тоа ќе биде првата точка од дневниот ред“ – изјави Брнабиќ и додаде дека очекува присуство на опозицијата во Собранието.
„Тоа е нивно работно место и нивна обврска кон граѓаните кои ги избрале, како и кон студентите за кои тврдат дека декларативно ги поддржуваат. Очекувам нивно присуство на таа точка од дневниот ред, како и на точката која се однесува на расправа за моето разрешување, односно гласањето за доверба кон мене. Тие се овластени предлагачи, така што навистина ги очекувам“, рече Брнабиќ.
Таа додаде дека, освен државните, блокирани се и приватните факултети, кои на студентите веќе им испратиле упатства за плаќање на дел од школарината.
„Ќе биде интересно да се види кога тие факултети повторно ќе започнат со работа, бидејќи, ако наскоро не се отворат, ќе се соочат со банкрот. Затоа очекувам дека многу брзо ќе продолжат со наставата. Нивниот најголем страв е банкрот, а за жал, и државните факултети се соочуваат со истата судбина. Сепак, таму не постои истиот вид на одговорност, бидејќи јавните средства често се доживуваат како ничии, иако всушност се наши. Тие факултети веќе претрпеа огромни штети. Според информациите кои ги имам, ФМК денес или оваа недела ќе започне со работа, што покажува дека се ближи моментот кога повеќе нема да има време за надокнада на академската година“, изјави Брнабиќ.
„Факултетите барале студентите да плаќаат целосна школарина, а државата потоа да ги врати парите од буџетот. Излеговме во пресрет на студентите и факултетите. Веќе никој не зборува за тие барања, дури ни во Ниш не сме слушнале ништо на таа тема. Моја претпоставка е дека факултетите се враќаат на работа бидејќи инаку ќе банкротираат. Ако се изгуби академската година – а реалниот краен рок за тоа е 17 март, по што физички нема да биде можно да се надокнади изгубеното градиво – се поставува прашањето што понатаму ќе се случува“, рече Брнабиќ.
