САД и Израел продолжуваат со бомбардирањето на цели во Иран, додека Техеран возвраќа со повремени ракетни и напади со дронови кон Израел и кон американските воени бази во земјите од Персискиот Залив.
Конфликтот сè повеќе се фокусира и на Ормускиот Теснец, клучната морска рута за светската трговија со нафта.
Новиот врховен лидер на Иран, Моџтаба Хамнеи, изјави дека теснецот ќе остане затворен како средство за притисок врз САД, предупредувајќи дека американските воени објекти ќе бидат мета на напади доколку „агресијата продолжи“.
Стратешки теснец и глобален ризик
Ормускиот Теснец е една од најважните поморски точки во светот, бидејќи низ него поминува значителен дел од глобалниот извоз на нафта.
Американската морнарица засега не е во состојба да обезбеди придружба за нафтените танкери низ затворениот теснец. Според американскиот министер за енергетика Крис Рајт, воените ресурси во моментов се насочени кон уништување на офанзивните капацитети на противникот.
Нафтата повторно над 100 долари
Во меѓувреме, растот на цената на нафтата повторно ја зголемува загриженоста за глобална енергетска криза. Цената на барел нафта вчера повторно се искачи над 100 долари.
Американскиот претседател Доналд Трамп изјави дека повисоките цени на нафтата носат економска корист за САД, како најголем светски производител.
Сепак, тој нагласи дека приоритет за Вашингтон останува запирањето на иранската програма за развој на нуклеарно оружје.
Според информации што доаѓаат од Белата куќа, порастот на цените е директно поврзан со изјавите на иранското раководство за можноста за блокирање на поморскиот премин во близина на Оманскиот Залив, што дополнително ги вознемири светските енергетски пазари.
