Истражувањето, објавено во The New England Journal of Medicine, покажа дека лекувањето на машките партнери значително го намалува повторното појавување на инфекцијата кај жените. БВ настанува како резултат на нерамнотежа на бактериите во вагината, предизвикувајќи симптоми како што се невообичаен исцедок, непријатен „рибен“ мирис, вагинално чешање и чувство на печење при мокрење. Сепак, не сите жени со оваа инфекција имаат симптоми.
Според Кливлендската клиника, оваа инфекција е најчеста кај жени на возраст од 15 до 44 години.
Што покажа истражувањето?
Научниците во Австралија анализирале 164 моногамни хетеросексуални парови за да утврдат дали лекувањето на машките партнери може да го намали повторувањето на инфекцијата кај жените.
- Во контролната група, жените со БВ добиле антибиотска терапија, додека нивните партнери не биле лекувани.
- Во втората група, и жените и нивните партнери добиле третман.
Резултатите покажале дека:
- 63% од жените во групата каде што машките партнери не примиле терапија повторно развиле БВ во рок од 12 недели.
- Кај жените чии партнери исто така примиле третман, само 35% повторно добиле инфекција.
„Нашето истражување покажа дека повторната инфекција е резултат на пренос од партнерите, што претставува силен доказ дека БВ всушност е сексуално пренослива инфекција“, вели професорката Катрјона Бредшо од Универзитетот Монаш.
Научниците повикуваат на промена во начинот на класификација и третман на оваа инфекција, истакнувајќи дека лекувањето на машките партнери може да помогне во спречувањето на нејзиното повторување.
„Долго време се сомневавме дека БВ е СПИ, бидејќи има сличен период на инкубација како повеќето сексуално преносливи инфекции и е поврзана со истите ризик-фактори, како што се промена на сексуален партнер и некористење кондоми“, објаснува д-р Ленка Водстрчил, една од авторките на студијата.
Иако медицинската заедница сè уште официјално не ја класифицира БВ како сексуално пренослива инфекција, доколку тоа се случи, таа ќе стане најчестата СПИ, надминувајќи ја кламидијата.
Ова истражување отвора нови можности за превенција и третман на БВ, со потенцијал да ја промени медицинската перцепција за оваа инфекција.
