Арапските и муслиманските држави, вклучувајќи ги Катар, Саудиска Арабија и Египет, за прв пат упатија заеднички повик до Хамас да се разоружа и да се откаже од власта во Појасот Газа, како дел од напорите за ставање крај на војната на територијата, пренесе Си Ен Ен.
Арапската лига, која брои 22 члена, целата Европска унија и уште 17 земји ја поддржаа декларацијата потпишана на конференцијата на Обединетите нации, чии домаќини беа Саудиска Арабија и Франција, во вторникот.
Состанокот во Њујорк имаше за цел да се осврне на „мирното решавање на палестинското прашање и спроведувањето на решението за две држави“, а декларацијата ги утврдува чекорите што потписниците сметаат дека треба да се преземат следно.
„Управувањето, спроведувањето на законот и безбедноста на целата палестинска територија мора да бидат единствено во надлежност на Палестинската самоуправа, со соодветна меѓународна поддршка“, се вели во заедничкиот документ, додавајќи дека „во контекст на завршување на војната во Газа, Хамас мора да го заврши своето владеење во Газа и да го предаде своето оружје на Палестинската самоуправа, со меѓународен ангажман и поддршка, во согласност со целта за суверена и независна палестинска држава“.
Во текстот, исто така, се осуди смртоносниот напад на Хамас врз Израел од 7 октомври 2023 година и се предложи распоредување на „привремена меѓународна стабилизациска мисија“ по покана на Палестинската самоуправа и „под покровителство на Обединетите нации“.
„Ја поздравивме подготвеноста изразена од некои земји-членки да придонесат со трупи“, се вели во него.
