Еве неколку клучни намирници што, според нутриционистите, може да помогнат во борбата против стресот, анксиозноста и депресијата:
Лиснат зеленчук
Спанаќот и другите видови лиснат зеленчук се богати со фолна киселина (витамин Б9), која е од суштинско значење за правилно функционирање на мозочните клетки. Недостигот од овој витамин може да се поврзе со зголемен ризик од депресија. Освен преку зеленчук, фолна киселина може да се внесе и преку грав, леќа и аспарагус.
Школки
Морските плодови, особено школките, се добар извор на витамин Б12, кој е важен за метаболизмот на мозочните хемикалии што го регулираат расположението. Нискиот нивото на овој витамин може да доведе до појава на депресија. Како алтернатива, се препорачува консумирање немасно говедско месо, млеко и јајца.
Кафе
Умерена количина кофеин може позитивно да влијае на расположението и да ја зголеми будноста. Сепак, кај лица со постпородилна депресија или панични напади, кофеинот може да има контраефект, па затоа е потребна претпазливост при негово консумирање.
Моркови
Овој зеленчук е богат со бета-каротен, антиоксиданс кој се поврзува со пониски нивоа на депресија. Бета-каротенот се наоѓа и во тиква, батат, спанаќ и диња. Иако не постојат цврсти докази дека директно ги спречува менталните нарушувања, неговата вклученост во исхраната е корисна.
Млеко
Млекото содржи витамин Д, кој е важен за одржување на емоционалната рамнотежа. Истражување спроведено во Норвешка покажало дека лица кои земале додатоци со витамин Д имале подобро расположение во споредба со оние кои не го правеле тоа. Витаминот Д може да се внесе и преку обогатени житарици, сокови или конзервирана риба.
Масна риба
Лососот, харингата и туната се добар извор на омега-3 масни киселини, за кои се смета дека имаат позитивен ефект врз менталното здравје. Тие ја подобруваат функцијата на мозочните хемикалии кои го регулираат расположението.
Бразилски ореви
Богати се со селен, минерал кој го штити организмот од оксидативен стрес. Ниското ниво на селен е поврзано со зголемена појава на анксиозност, особено кај младите лица. Неколку бразилски ореви дневно можат да го задоволат препорачаниот дневен внес на овој минерал.
Иако овие намирници не се лек за сериозни ментални нарушувања, нивната редовна вклученост во исхраната може да помогне во одржување на психичка рамнотежа и подобро справување со секојдневниот стрес.
