Воената помош на САД за Украина во 2025 година е намалена за 99%, покажува најновиот извештај на Килскиот институт за светска економија, пренесува The Kyiv Independent. Намалувањето се совпадна со првата година од мандатот на американскиот претседател Доналд Трамп.
Според податоците од Ukraine Support Tracker на Килскиот институт, европската воена помош за Украина во 2025 година пораснала за 67%, додека хуманитарната и финансиската поддршка се зголемиле за 59%. Благодарение на овој раст, вкупната поддршка за Киев останала релативно стабилна, иако американската воена помош драстично се намалила.
Сепак, вкупната воена поддршка во 2025 година била за 13% пониска од годишниот просек во периодот од 2022 до 2024 година.
Падот на американската воена помош се поклопува со почетокот на мандатот на претседателот Трамп во јануари 2025 година. Од инаугурацијата наваму, не бил одобрен ниту еден нов пакет воена помош преку механизмот Претседателски овластувања за повлекување (PDA), кој често го користеше претходниот претседател Џо Бајден.
Наместо директни пакети, администрацијата на Трамп се определила за продажба на оружје на Украина преку НАТО-партнери, користејќи го таканаречениот Приоритетен список на украински барања (PURL). Во 2025 година, земји-членки на НАТО купиле американско оружје за Киев во вредност од 3,7 милијарди евра (4,39 милијарди долари). Набавките вклучувале ракетни системи HIMARS и батерии за противвоздушна одбрана Patriot.
Во извештајот се наведува дека Европската унија сега обезбедува најголем дел од финансиската и хуманитарната помош, додека воената помош останува концентрирана кај помал број држави. Според раководителот на проектот Ukraine Support Tracker, Кристоф Требеш, зголемената улога на ЕУ придонела за порамномерна распределба на финансискиот товар во рамки на Унијата, во согласност со уделот на БДП на земјите-членки.
Меѓутоа, воената поддршка и натаму зависи од билатерални донации, каде што распределбата не е рамномерна. Германија и Обединетото Кралство обезбедиле две третини од вкупната воена помош на Западна Европа во периодот од 2022 до 2025 година, додека северноевропските земји се втори најголеми донатори.
Истовремено, помошта од источна и јужна Европа е значително намалена. Воената поддршка од источна Европа паднала од 17% во 2022 година на 2% во 2025 година, додека од јужна Европа се намалила од 7% на 3% во истиот период.
Извештајот доаѓа во момент кога војната во Украина се приближува кон четвртата годишнина од руската инвазија, а распределбата на товарот меѓу САД и Европа останува клучно прашање во поддршката на Киев.
