Го пренесуваме соопштението на Академскиот пленум во Србија во поглед на последните случувања таму и новото здружение кое се формира.
Денеска во Научно-технолошкиот парк во Нови Сад ќе биде основано здружението „Професори 2.0“, под маска на „Институт за академско делување“ и под раководство на Патрик Дрид, првиот декан кој повика полиција да интервенира против своите студенти.
Бидејќи најголемиот дел од академската заедница ги поддржа барањата на студентите во блокада и нивната борба за поправедно општество, власта одлучи да формира граѓанско здружение кое ќе биде претставено како дел од академската заедница што ја поддржува политиката на Александар Вучиќ.
Како регистрирано граѓанско здружение, тие ќе можат да конкурираат за финансирање од буџетите на локалните самоуправи, покраината и републиката. Имајќи ја предвид блискоста на Дрид со власта, не се сомневаме дека со наши пари ќе се финансира нивната кампања за кревање на рејтингот на оваа власт, по методите на Гебелс, со огромна поддршка на сите таблоиди.
Дополнително загрижува фактот што Статутот на ова здружение предвидува дека членови можат да бидат и малолетници постари од 14 години. Здружение кое се претставува како академско, а истовремено вклучува малолетници без јасни процедури за нивна заштита, јасно покажува дека станува збор за политичко-маркетиншки проект, а не за сериозна академска иницијатива.
Академскиот пленум е уверен дека ваквите квази-академски здруженија не можат да ги потиснат автентичните академски мрежи кои, заедно со студентите, продолжуваат да го бранат универзитетот како простор на слобода, критичко мислење и отпор кон автократијата и корупцијата.
