Руската Белгородска област, која се наоѓа на границата со Украина, во 2025 година забележала рекорден број пријавени случаи на силување – вкупно 199, што е највисока бројка од 2008 година наваму. Податоците ги објави независниот проект „To Be Precise“, а ги пренесе порталот Meduza.
Според анализата, бројот на пријавени силувања нагло пораснал во 2022 и 2023 година, потоа привремено опаднал, за во 2025 повторно драматично да скокне. Адвокатката за човекови права Мари Давтјан вели дека постои јасна поврзаност со „надворешните околности“, алудирајќи на војната во Украина, иако предупредува дека официјалните податоци не дозволуваат цврсти заклучоци.
Едно од можните објаснувања, според неа, е зголеменото присуство на воен персонал во регионот. „Истражувањата покажуваат дека стапката на насилство е повисока во средини со голема концентрација на вооружени сили“, наведува Давтјан.
Сепак, проектот „To Be Precise“ укажува дека сличен тренд не е забележан во сите руски региони долж украинската граница, што ја прави врската меѓу војната и порастот на сексуалното насилство тешка за директно докажување. Дополнителен проблем е ограничениот пристап до податоци: детални криминални статистики се јавно достапни само до 2022 година, а судските пресуди за сексуално насилство се класифицирани.
Загрижува и фактот што само мал дел од случаите завршуваат на суд. Во 2024 година, само 14 проценти од регистрираните случаи на силување во Белгород стигнале до судска постапка. Останатите биле прекинати, одложени или преквалификувани во полесни кривични дела.
Според последните достапни податоци од руското Јавно обвинителство, дури 82 проценти од жртвите на силување во Белгород во 2022 година биле малолетници – значително над националниот просек. Експертите предупредуваат дека затворањето на статистиките од 2023 година дополнително ја затемнува сликата за вистинските размери на проблемот.
