Во Рио де Жанеиро беше изведена најголемата но истовремено и најсмртоносна полициска операција во која се убиени најмалку 132 лица.
Тој број е двојно поголем од претходно познатиот официјален број на жртви за време на акцијата каде првичните информации беа дека убиени биле 64 лица.
„Според нашите најнови бројки, бројот на жртви е 132“, изјави за АФП Канцеларијата на јавниот правобранител, државната агенција на Рио која обезбедува правна помош на најранливите.
Гувернерот на Рио, Клаудио Кастро, рече дека официјалниот број на жртви од операцијата против дрога од претходниот ден останува околу 60, но предупреди дека тој ќе се промени бидејќи смртните случаи се бројат само откако ќе пристигнат во мртовечницата.
Локалните власти во вторник соопштија дека 2.500 полицајци учествувале во операцијата против трговците со дрога во Рио де Жанеиро.
Масовната операција се фокусираше на две фавели на север од Рио де Жанеиро кои се блиску до меѓународниот аеродром.
Тешките полициски операции се вообичаени во Рио, главната туристичка дестинација на Бразил, особено во фавелите, сиромашните и густо населени населби кои често се управувани од трговци со дрога.
Околу 700 луѓе загинаа за време на полициските операции во градот минатата година.
