Побуненичкото движење Хути од Јемен изврши напад со хиперсонични балистички ракети врз повеќе цели во Тел Авив. Портпаролот на Хутите, Јахја Сариа, соопшти дека операцијата била успешна, додека израелската армија ја пресретнала една од ракетите. Засега нема извештаи за повредени или за материјална штета.
Напад со ракета „Палестина-2“
Според портпаролот на вооружените сили на Хутите, Јахја Сариа, ракетата „Палестина-2“ со повеќекратни боеви глави погодила неколку ранливи цели во регионот на Тел Авив, и операцијата целосно ги исполнила своите цели.
„Ракетните сили на јеменските вооружени сили спроведоа воена операција користејќи хиперсонична балистичка ракета ‘Палестина-2’ со повеќекратни боеви глави, која ги погоди неколкуте ранливи цели во окупираниот регион Тел Авив. Операцијата беше успешно изведена“, изјави портпаролот за телевизијата Ал Масира, која е во сопственост на Хутите.
Израелска реакција
Израелската армија (ЦАХАЛ/IDF) објави дека успешно пресретнала балистичка ракета испукана од јеменските Хути во текот на ноќта.
Како одговор на воздушниот напад, беа активирани сирени за воздушна опасност во Тел Авив и други населени места низ централниот дел на Израел, пренесува израелскиот медиум Times of Israel.
Според истиот извор, во моментот нема информации за повредени лица или причинета материјална штета.
