Шпанското Воено воздухопловство соопшти дека борбениот авион EF-18 Hornet “изведе избежувачки маневар откако детектираше јато птици на неговиот пат”.
Инцидентот се случи за време на Фестивалот на воздухот во Хихон, одржан викендов во Астурија, северна Шпанија. Авионoт изведуваше демонстрација на мала височина кога одеднаш нагло се оттргна од рутината.
Видеа од местото на настанот прикажуваат како авионот се врти наопаку, остава црн чад и се движи кон морето, пред да се оддалечи во последен момент.
Посетителите на плажата Сан Лоренцо снимаа со своите телефони додека некои викаа и врескаа од шок додека авионот едвај избегна трагедија.
Во објава на мрежата X во понеделникот, шпанските воздухопловни сили соопштија дека “маневарот е дел од стандардната процедура за заштита на пилотот и публиката. Нашите пилоти се обучени да реагираат за дел од секунда на неочекувани настани”.
Фестивалот во Хихон го посетија повеќе од 300.000 луѓе, што го направи најголем во историјата на настанот. Присуствуваа и Шпанските воздухопловни и вселенски сили, служби за спасување, морнарицата и националната полиција.
Сличен инцидент се случи минатиот месец на аерошоуто Aire25 во Мурсија, каде галеб се судри со шпански Eurofighter Typhoon, при што се скрши кабината и се оштети шофершајбната, принудувајќи го пилотот веднаш да слета.
Според Меѓународната организација за цивилно воздухопловство (ICAO), од 2016 до 2021 година глобално се пријавени најмалку 270.000 удари на диви животни во воздухопловството.
