Авганистан и Пакистан повторно влегоа во вооружени судири долж нивната 2.600 километри долга и тешко проодна граница. Последната ескалација започна откако талибанските сили нападнаа пакистански позиции, наведувајќи дека станува збор за одмазда за претходните пакистански бомбардирања. Пакистан одговори со воздушни напади врз повеќе локации во Авганистан, вклучително и Кабул, Пактија и Кандахар.
Двете страни изнесоа различни податоци за жртвите. Пакистан соопшти дека се убиени 133 талибански борци, додека Авганистан тврди дека осум нивни војници загинале. Овие информации засега не се независно потврдени.
Пакистан располага со околу 600.000 редовни војници и 300.000 резервисти и е нуклеарна сила, додека Авганистан има помалку од 200.000 припадници, со ограничена и претежно застарена воена опрема, но со долгогодишно искуство во герилско војување.
Од сојузништво до тензии
Иако двете земји имаат блиски економски и културни врски, нивните односи се обременети со долгогодишни безбедносни спорови. По падот на Талибанците во 2001 година, Пакистан беше обвинуван дека им обезбедува засолниште и поддршка. По нивното враќање на власт во 2021 година, Исламабад се соочи со пораст на насилство, за кое ги обвинува пакистанските талибанци и тврди дека добиваат засолниште во Авганистан – обвинувања што Кабул ги отфрла.
И претходно имаше смртоносни судири и привремени прекини на огнот, со посредство на регионални сили како Саудиска Арабија, Турција и Катар. Сегашната ескалација повторно го отвора прашањето за стабилноста во регионот и безбедносните ризици долж една од најчувствителните граници во светот.
