Луѓето кои секојдневно земаат мултивитамини можеби треба повторно да ја преиспитаат оваа навика. Британскиот фармацевт Amir Bhogal од аптеката Pyramid привлече внимание со видео во кое објаснува зошто не им ги препорачува овие додатоци на своите клиенти.
Според него, главниот проблем е што мултивитамините често содржат премногу од супстанции што не му се потребни на организмот, а недоволно од оние што навистина недостасуваат. Наместо тоа, тој советува да се направи крвна анализа за прецизно да се утврди дефицитот, а потоа да се земаат само конкретни витамини и минерали, прилагодени на индивидуалните потреби.
Сличен став има и National Health Service, каде се нагласува дека повеќето луѓе треба да ги добиваат потребните витамини и минерали преку балансирана исхрана. Сепак, во одредени случаи, како кај бремени жени или деца, додатоците може да бидат неопходни. Истовремено, се предупредува дека прекумерното внесување на одредени витамини може да биде штетно за здравјето.
Фармацевтот дополнително објаснува дека честопати луѓето се жалат дека суплементите не делуваат, но причините може да бидат различни. Можеби не земаат соодветен додаток, не го користат правилно или не му дале доволно време да покаже ефект. Некои витамини имаат потреба од неколку месеци редовна употреба за да се забележат резултати, а важен фактор е и квалитетот на производот.
Затоа, најдобриот пристап е информирано и внимателно користење на додатоците, со претходна консултација со лекар или стручно лице, наместо слепо потпирање на мултивитамински препарати.
