Според Стив Марко од американската компанија „Tillamook“, најлошото нешто што можете да му го направите на сирењето е – да го замрзнете.
Зошто замрзнувањето е проблем?
„Кога сирењето се замрзнува, влагата во него се претвора во ледени кристали кои ги оштетуваат структурите на мастите и протеините“, објаснува Марко за Simply Recipes.
По одмрзнувањето, овие оштетени структури почнуваат да испуштаат масло, што доведува до побрза оксидација и променет, често чуден вкус.
Дополнително, значително страда и текстурата. Кај чедарот, на пример, протеините нормално се опуштаат за време на зреењето и создаваат кремаста структура. Но, екстремната студеност може да ги раздвои и наруши, па сирењето станува зрнесто. Колку повеќе влага има во сирењето, толку посилно замрзнувањето го менува – едноставно затоа што има повеќе вода што создава ледени кристали.
Како правилно да го чувате сирењето?
Марко истакнува дека луѓето често стравуваат да купат квалитетно сирење без веднаш да го стават во термо-торба, но тоа е непотребно.
Исто така, датумот отпечатен на пакувањето не е строга граница. „Сè додека изгледа чисто и нема мувла, сирењето во оригиналното пакување може да стои во фрижидер и до една година“, вели тој.
За оптимално чување на сирењето:
- држете го во оригиналното пакување додека не го користите,
- чувајте го во најстудениот и најтемниот дел на фрижидерот,
- одрежувајте само онолку колку што ви е потребно, со чист нож и чисти раце,
- остатокот веднаш вратете го во фрижидер – така може да трае уште со недели.
Што ако веќе сте го замрзнале?
Не е се загубено. Замрзнатото сирење и понатаму може да се користи – само не е идеално за јадење „на парче“.
„Доколку сирењето ќе се користи само за готвење или печење, најверојатно воопшто нема да забележите дека било замрзнато. Ако оди, да речеме, во лазања – тоа не е никаков проблем“, додава Марко.
Со други зборови: избегнувајте замрзнување ако сакате да го задржите вистинскиот вкус и текстура на сирењето, но ако готвите – сосема слободно користете го.
Извор: Index.hr
