Навидум случајно однесување, но всушност има свои причини и е повеќе поврзано со природата на мачката отколку што мислите.
Ветеринарите велат дека сè што прават мачките не е без причина и ова не е исклучок.
Најчестите причини зошто вашата мачка сака да ја „тестира гравитацијата“ се следниве:
Предаторски инстинкт
Мачките по природа се ловци. Кога ќе видат дека нешто се движи, дури и многу малку, тоа може да го поттикне нивниот ловечки инстинкт.
Туркањето предмети со шепите имитира лов, нешто длабоко врежано во нив, пишува „ПетМД“.
Научено однесување
Можеби несвесно го охрабрувате ова однесување. Ако секогаш кога мачката почне да ја турка чашата од работ на масата, вие реагирате, разговарате со неа, ја земате или ѝ обрнувате внимание, таа ќе научи дека вака ја добива вашата реакција.
А за мачката вниманието е награда.
Досада
Мачките кои не добиваат доволно стимулација ќе најдат свој начин да се забавуваат.
Ако го поминат целиот ден сами без играчки и активности, туркањето на работите од полиците може да стане најинтересниот дел од денот.
Како да спречите мачка да ги уништува работите?
Пред да се обидете да промените однесување, важно е да разберете зошто тоа го прави.
Забележете кога и каде го прави тоа, дали е секогаш во ваше присуство, кога е гладна или кога не ѝ обрнувате внимание? Потоа пробајте ги следните чекори:
Отстранете ги кршливите предмети
Отстранете сè што не сакате да го видите на подот од достапните површини. Обезбедете ги кршливите предмети во затворени плакари или на места каде што мачката не може да стигне.
Збогатете го нејзиниот простор
Мачките сакаат да се качуваат и истражуваат. Обезбедете ѝ столбови за гребење, интерактивни играчки или високи површини како што се полици.
Одлична опција е и прозорецот со птичја перспектива.
Одговорете соодветно
Не обрнувајте внимание на неа кога прави нешто што вие не сакате да го прави.
Наместо тоа, понудете ѝ поинтересна алтернатива, фрлете играчка или користете интерактивни хранилки.
Целта е мачката повеќе да се забавува со работите што смее да ги допира отколку со вашите растенија или очила.
