Камерите ја снимија конгресменката Стејси Пласкет како испраќа порака на својот телефон додека се подготвува да постави прашање. Оваа недела стана јавно кој бил човекот од другата страна на пораката – осудениот сексуален престапник Џефри Епстајн.
Според новите мејлови што ги објави неговиот имот по судски налог, Епстајн ја охрабрувал Пласкет да постави прашање поврзано со еден вработен во „Трамп Организација“. Кога таа тоа го направила, Епстајн ѝ вратил порака: „Добра работа.“
Колку бил длабок неговиот продор во елитата
За многумина ова е уште една потврда за обемот на влијанието што Епстајн го имал врз американските политички и деловни кругови. Пласкет, претставничка од Американските Девствени Острови, негира дека барала совети од него, но призна дека комуницирала со повеќе луѓе тој ден – меѓу кои и Епстајн, кој бил нејзин гласач.
Таа истакна дека размената се случила пред неговото апсење за сексуална трговија, но долго по неговата прва пресуда во 2008 година. Нејзиното име се најде во обемната архива од над 20.000 страници лични документи кои откриваат дека Епстајн, и покрај криминалната биографија, успеал да одржи голема мрежа моќници околу себе.
„Моќен, харизматичен и опасен“
Бери Левин, автор на книгата The Spider, објаснува дека Епстајн бил „дијаболичен монструм“, но истовремено човек со „извонредна способност да гради мрежи со најмоќните луѓе во светот“.
Тој се сметал за „собирач на луѓе“, а информациите што ги добивал од нив ги користел за услуги, пари или – како што сугерираат истражителите – можен уценувачки материјал.
Случајот Манделсон
Во Велика Британија, под особено внимание е врската меѓу Епстајн и лорд Питер Манделсон, кој во септември беше разрешен од функцијата амбасадор на Велика Британија во САД. Мејловите покажуваат дека Манделсон бил во контакт со Епстајн сѐ до крајот на 2016 година – години по неговата пресуда во 2008.
Во една порака, Епстајн му пишува: „63 години. Стигна до таму.“ Манделсон му возвраќа за помалку од еден час: „Едвај. Одлучив да си го продолжам животот поминувајќи повеќе време во САД.“
Манделсон негира знаење за неговите злосторства, но изразува жалење за контактите.
Круг на академици, милијардери и политичари
Архивата покажува дека Епстајн одржувал контакти со научници, претприемачи и високи политички фигури – некои од нив тврдат дека не биле запознаени со неговите злодела или пак биле заслепени од неговото богатство.
Познатиот лингвист Ноам Чомски во мејл пишува дека имале „многу длабоки дискусии“, додавајќи дека Епстајн му помогнал да префрли пари меѓу сметки – без самиот Епстајн да заработи „ни цент“. Чомски вели дека се водел од принципот дека по отслужена казна, човек добива „нова шанса“.
Поранешниот претседател на Харвард, Лери Самерс, пак, од Епстајн барал љубовни совети уште во 2018 година – истиот месец кога Miami Herald ја објави разобличувачката истрага. Скандалот минатата недела го натера Самерс јавно да се извини и да се повлече од јавните активности.
Тие што ја прекинале врската
Името на Доналд Трамп често се појавува во документите, но без размена на пораки. Трамп и Епстајн некогаш биле блиски пријатели, но според Трамп, раскинале во раните 2000-ти. Белата куќа подоцна соопшти дека Епстајн бил исфрлен од клубот Мар-а-Лаго „затоа што се однесувал непримерно кон женски вработени“.
„Грд човек“
Единствениот кој вели дека веднаш ја препознал опасноста бил Хауард Латник, актуелен секретар за трговија на САД. Тој бил сосед на Епстајн и раскажува како по првата посета на неговата куќа, видел масажна маса со свеќи. Кога го прашал Епстајн колку често ја користи, овој му се доближил и рекол: „Секој ден. И вистинската вид масажа.“
Латник и неговата сопруга веднаш си заминале. „Одлучив никогаш повеќе да не бидам во иста просторија со тој одвратен човек,“ изјави тој.
