Новоизбраниот градоначалник на Њујорк, Зохран Мамдани, во средата го започна процесот на формирање на својата администрација, најавувајќи „најамбициозна политичка платформа на една генерација“.
Мамдани, 34-годишен демократски социјалист, изјави дека веднаш по преземањето на функцијата на 1 јануари ќе започне да работи „за граѓаните на Њујорк“.
Женски тим на чело на транзицијата
На прес-конференција во Квинс, Мамдани откри дека неговиот транзициски тим ќе го сочинуваат исклучиво жени, а на чело ќе биде Елана Леополд како извршна директорка.
Меѓу копретседавачките се: поранешната заменичка градоначалничка Марија Торес-Спрингер, поранешната претседателка на Федералната комисија за трговија Лина Кан, директорката на United Way организацијата Грејс Бониља и поранешната заменичка за здравство Мелани Харцог.
„Во наредните месеци ќе изградиме градска администрација која ќе ги исполни ветувањата од кампањата – администрација со способности и сочувство, водена од интегритет,“ изјави Мамдани.
Реформисти во администрацијата
Изборот на Лина Кан, позната по својата борба против монополите во времето на администрацијата на Џо Бајден, укажува дека Мамдани планира сериозни системски промени и воведување на нова, реформска политика во градската управа.
Мамдани ќе биде првиот муслиман, првиот градоначалник со јужноазиско потекло, првиот роден во Африка и најмладиот во последните 100 години.
Сепак, неговиот избор дојде во време на тензии — претседателот Доналд Трамп отворено му се спротивстави, најавувајќи дека ќе го ограничи финансирањето на градот доколку Мамдани ја преземе функцијата.
Мета на исламoфобни напади
Во текот на кампањата, Мамдани беше цел на жестоки исламoфобни напади.
Републиканските конгресмени Ренди Фајн и Енди Оглс дури побараа од Министерството за правда да му се одземе државјанството и да биде депортиран, додека поранешниот гувернер Ендрју Куомо саркастично изјави дека Мамдани би „навивал“ за нов напад како оној на 11 септември.
Истражување на Центарот за проучување на организирана омраза покажа дека исламoфобните објави за Мамдани на платформата X пораснале за 450% во само еден месец, достигнувајќи над 36.000 објави со повеќе од 7 милиони лајкови.
Прогресивна агенда и ветувања
И покрај нападите, Мамдани најави дека ќе спроведе социјално прогресивна политика, која вклучува: замрзнување на кириите, бесплатен градски превоз, универзална грижа за децата, јавни продавници за храна,
финансирани преку зголемување на даноците за богатите и корпорациите.
„Нашата цел е град во кој сите се чувствуваат прифатени и одговорни за заедничкиот успех,“ изјави Мамдани, пренесува Guardian.
